ලෝකය දැන් බොහෝ දුරට විශ්ව ගම්මානයක් බවට පත්වී හමාරය.එමෙන්ම රටක ප්‍රගමනයට අනෙක් රටවල බලපෑම,නොවැලැක්විය හැකි කාරණයක් බවට පත්වන්නේ මෙම ආර්ථික,සමාජ දේශපාලන වටපිටාව දෙස බැලූ විටයි. රටක් තුළ පවතින ගැටලු රට තුළ විසඳගත යුතු වුවත් ඊට විදේශික බලවේග මැදිහත්වීම ගෝලියකරණය තුල ස්භාවිකය. අප කළ යුත්තේ රටට අනිසි බලපෑම් සිදු කරන ප්‍රජාවන් තුලනය හා නියාමනය කිරීමයි.ඒ හැර දැඩි අධිරාජ්‍යය විරෝධී ප්‍රතිපත්ති අදට වලංගු නැත.ඒ විමල් වීරවංශ උන්නැහේද දනී.නමුත් මව්බිමේ පංචායුධය ලෙස තමන්ව හදුන්වා ගන්නා ඔහුට ඉන් මිදී පැවැත්මක් නොමැති හෙයින් තමා අධිරාජ්‍යය විරොධියකු ලෙස හදුන්වා ගනී.

කලක් මාක්ස්වාදී කොමියුනිස්ට්කාරයෙකු ලෙස වේදිකා දෙවනත් කළ විමල්ට ඇමෙරිකාව නයාට අදු කොළ බදු විය.ලෝක බැංකුව සමඟ තිබු අමනාපය කිසිදා නොවිසදෙන නැන්දම්මා ලේලී ගැටලුව බදු දෙයක් ලෙස වීරවංශ සහෝදරයා එකළ යටිගිරියෙන් වේදිකා දෙවනත් කළේය.ඔහුගේ අවධානාත්මක හඬට මනස හිරිවැටුණ උන් වේදිකාවට ප්‍රතිචාර දැක්වුයේ ඉතා උණුසුම් අන්දමිණි.

නමුත් පක්ෂය ඔහුට වෙඩි තැබූ බව පවසා ලෙනින්ගෙන් හා මාක්ස්ගෙන් දික්කසාද වන විමල් සහෝදරයා එතැන් පටන් වීරවංශ මැතිතුමා බවට පත්වෙයි.සරල දිවිපෙවෙතක් ගත කළ ඔහුට පෙර,පසු ගමන් රථ සමඟ ප්‍රාඩෝවක යාමට සිදුවන්නේ පක්ෂය විසින් ඔහුට සිදුකළ වෙඩි තැබීමේ කරුමයටය.සාමාන්‍යයෙන් යමෙකුට වෙඩි තැබුවිට ඔහු මියයාම සිදුවුවත් විමල් හෙණරාජ තෛලය අරලිය ගහ මැදුරෙන් ලබාගෙන තිබු නිසා එයින් ඔහු තවත් ශක්තිමත් විය.

දැන් ඔහුට ලෝක බැංකුවේ ප්ලග් ගැලවීමට උවමනාවක් නැත,ඒ වෙනුවට බිරිඳ සමග රට සවාරි යන්නේ තරුණ අවදියේ සීගිරි යාමට නොහැකි වු නිසා විය හැකිය.අප ඊට ඊර්ෂ්‍යයා නොකරමු.එකෙක් හරි ගොඩ ගියා සිතා සතුටුවෙමු.නමුත් විමල් මහත්මයාට මතක් කළ යුතු දෙයක් ඇත.ඔබ එදා කථා කළ පන්ති සමාජය අද එලෙසින්ම පවතී.ඇත්තා නැත්තාව තලාපෙලයි.අධ්‍යාපනය මුදලට සීමා වී ඇත.රැකියා පන්තියකට සීමා වී ඇත.අප ඇතිවුන්ට ගැරහීමට කුහක නැත.නමුත් කරන්නට ඉල්ලීමක් ඇත.එනම් සවසට බසයට ගොඬ වීමට බලා සිටින එක් අයෙකු හෝ ඔබගේ පසු ගමන් රථයට නංවාගන්න.එයත් ලොකු පිනකි.ඔබ එදා කථා කළ සම සමාජය යථාර්තයක් වන්නේ එවිටයි.

සටහන කර්තෘගෙනි.

ඉහත ජායා රූපයේ දැක්වෙන්නේ මව්බිම පුවත් පතේ මංගල කලාපය සමඟ නිකුත් කළ අතිරේකයයි.මව්බිම පුවත්පත දිගින් දිගටම විපක්ෂය ශක්තිමත් කිරීමට පෙනී සිටියද ඔවුන්ගේ ක්‍රියා කලාපය අනුව පෙනී යන්නේ ටිරාන් අලස් අපූරු ඩබල් ගේම්කාරයෙක් බවයි.එජාප නායක රනිල් වික්‍රමසිංහ මහතා ආණ්ඩුවේ කොන්ත්‍රාත්කරුවෙකු ලෙස හංවඩු ගැසුවද මව්බිම පුවත් පතද ඉතාමත් සීරුවට මාරුවට කඩේ යයි.

ජෙනරාල් සරත් ෆොන්සේකා නිදහස් කර ගැනීමට සාකච්ජා කිරීමට නිතර අරලිය ගහ මැදුරේ රිංගන ටිරාන් සැබවින්ම ජෙනරාල් ගැන පමණක් කථා කරනවාදැයි සැක සහිතය.අපට ඇති ගැටලුව නම් මේ මිතුරුකම කවදා ඇති වු දෙයක්ද යන්නයි.ජෙනරාල්ගේ ජනාධිපතිවරණයේ පෙරටුගාමියෙකු ලෙස සිට සටන පාවාදෙන්නෙකු ලෙස ක්‍රියාකරන්නේ දැයි අපට සැක පහළ වී ඇත.

රටේ නිදහස් අධ්‍යාපනයත්,ජාතික පාසල් ක්‍රියාවලිය අඩපන කිරීමට දායකත්වය ලබාදෙන එක් පුද්ගලයෙකු වන ටිරාන් අලස් උන්නැහේ විපක්ෂ නායකවරයාවද විවේචනය කරමින් මීළඟට කුමකට සැරසේදැයි නිශ්චය කර ගත යුතුය.රටේ බෞද්ධ අධ්‍යානයට ටිරාන් අලස් – ශිරන්ති රාජපක්ෂ සමඟ එක්ව කරන හානිය මීළඟ ලිපියෙන් බලාපොරොත්තුවන්න.

සටහන අමනයාගෙනි.

ශ්‍රී ලංකාවේ එදා මෙදාතුර ඉදිකළ අති දැවැන්ත රංග ශාලාව වන්නේ නෙලුම් පොකුණ මහින්ද රජපක්ෂ රංග ශාලාවයි.අති නවීණ උපකරණ සහ පහසුකම් වලින් සමන්විත මෙම රංග ශාලාවට නඩත්තු වියදම් ඉතාමත් අධික වන නිසාවෙන් එහි දිනකට එනම් ප්‍රදර්ශණ වාර 3කට දස ලක්ෂ පනස් දහසක් අය කරයි.එපමණක් නොව එය වෙන් කරවා ගැනීමට අත්තිකාරම එක් ලක්ෂ පනස් දහසකි. සරලව කියනවා නම් මෙම ශාලාව වෙන් කළ පසු උත්සවය තිබ්බත් නැතත් කුඩුවෙන ගණනන ලක්ෂ එක හමාරකි.

මෙය ඉදිකරන ලද්දේ රු. බිලියන 3.8ක චීන රජයේ ආධාර මතය.සියලු පහසුකම් වලින් සමන්විත රංග ශාලාවේ ජායා රූප නැරඹීමට අපගේ “රූ පෙළ” වෙත පිවිසෙන්න. කරුණු එසේ තිබියදී මෙහි පළමු වරට ඉදිරිපත් කළ සංදර්ශණය ලෙස කලාව පිළිබඳ ජනාධිපති උපදේශක රෝහණ වීරසිංහ මහතාගේ “ආදරණීය රෝහණ” නම් ප්‍රසංගයයි.ඉන් පසු මෙහි සංදර්ශණ පැවැත්වු බවට නම් අප දන්නේ නැත. සමහරවිට පවත්වන්නටද ඇත. නොපැවැත්වුවා නම් ඒ ලංකාවේ සියලු කලාරුවන් ජනාධිපති උපදේශකයින් නොවන නිසාවෙනි.

ලංකාවේ මෙවැනි රංග ශාලාවකට අඩියතැබීමට නොහැකි දුප්පත් කලාකරුවන්කොතරම් ඇත්ද, ඔවුන්ටද මෙම වේදිකාවට ගොඩවීමට ක්‍රමවේදයක් සකසන්නේ නම් ජනාධිපතිතුමන්ගේ ආශ්චර්යයේ සිහිනය
වැඩි ඈතක නොවෙනු ඇත.

සටහන කර්තෘගෙනි.

ඕනෑම ව්‍යාපාරයක් සමාජ ව්‍යාපාරයක් බවට පත්වන්නේ ජනතාව සමඟ සහ සම්බන්ධ වු විටය.එනම් ජනතාවගේ ඕනෑ එපාකම් සමඟ බද්ධ වු විටය. එමෙනම එකී ව්‍යාපාර ඇනගන්නේද සැබෑ ජනමතය නියෝජනය නොකිරීම නිසාවෙනි. අද සංවිධානය කරන ලද “කලු ජනවාරිය” ද එවැනි ව්‍යාපාරයක් බවට පත්වීම කණගාටුවට කාරණයකි. සැබවින්ම ලංකාව තුල මාධ්‍යයට අනේකවිද දුක්පීඩාවලට මුහුණ පෑමට සිදුවේ.නමුත් ඒ අතර තම වගකීම හරිහැටි ඉටුකරන, මාධ්‍ය සදාචාරයට පටහැණි නොවන ලෙස ක්‍රියාකරන මාධ්‍යය ඇත්තේ කුඩා ප්‍රමාණයකි. රජයේ මාධ්‍යය නම් දිනපතා රජයට කඩේයයි.ඊට රුකුල්දෙන පෞද්ගලක මාධ්‍යද ඇත. එක් පුද්ගලයන්ට වෙන් වෙන්ව කඩේ යන මාධ්‍යයද ඇත. අපට ඇති ප්‍රශ්ණය නම් එවැනි මාධ්‍යය රෙදි ඇදගෙන මාධ්‍යය නිදහස ඉල්ලන්නේ කෙසේද යන්නයි.

එක් පාර්ශවයකට කඩේ යනවිට අනෙක් පාර්ශවයේ උදහසට ලක්නොවී සිටීම තරමක් අපහසු කාරණයකි. මෙවර කලු ජනවාරියට සිදුවුයේ එවැනි සංසිද්ධියකි. ලංකාවේ මාධ්‍යය මර්ධනය පිළිබඳව කථා කරන විට නිතර මතකයට එන සිද්ධි ගණනාවක් ඇත. විශේෂත්වය නම් ඉන් බහුතරයක් සිදුවී ඇත්තේ ජනවාරි මාසය තුලයි.එකී කාරණය හේතුවෙන් ජනමාධ්‍යය සංවිධාන එකමුතුව අද (25) කැදවු විරෝධතාව “කලු ජනවාරිය” නම් විය. ඊට සියලු මාධ්‍ය එකමුතුවන්ට සහ සිවිල් සංවිධානවලට ආරාධනා කර තිබුණි. ආණ්ඩුවත් ඊට නහුතෙට බයවුයේ ඊට ජන අරගල ව්‍යාපාරයත්, රනිල් සහ සජිත් පාර්ශව දෙකම සහභාගි වේයයි යන පුර්ව නිගමනයෙනි.සැබවින්ම එසේ සැලසුම් කර තිබුණි. එපමණක් නොව ඊට එරෙහි වෙනත් උදඝෝශණයක්ද සංවිධානය කර කලු ජනවාරියට එරෙහි උසාවි නියෝගයක්ද ලබාගත්තේය. එම නියෝගයේ සදහන්ව තිබුණේ මාර්ගය අවහිර කිරීමත්, පෙළපාලියෙන් ගමන් කිරීමත් තහනම් කරන කරුණු කිහිපයකි. ඉන් ආණ්ඩුවේ බයවීම අපූරුවට කියාපායි.මන්ද කලු ජනවාරිය යන නම ඇසීමෙන් ආණ්ඩුවේ උන්දැලාගේ සිතට ආවේ කලු ජුලියයි. එමනිසා ආණ්ඩුව විසින්ද මෙය නැවැත්වීමට කළහැකි සියලු දේ කළේය.උදේ සවස ඊට එරෙහි පුලුල් ප්‍රචාරණයක් දුන්නේය.

නමුත් රජය සිතූ ලෙසින් දැවැන්ත උද්ඝෝෂණයක් සංවිධානය කිරීමට මාධ්‍ය එකමුතුවට නොහැකිවිය. ඔවුන් අපේක්ෂා කළේ ජන අරගල ව්‍යාපාරයේ පොදියක් ඊට සහභාගී වේයැයි කියාය.නමුත් එහි ප්‍රධාන කිහිපදෙනෙක් හැරුණු කොට බලාපොරොත්තු වු ජනකාය නොආවේය. රනිල් පාර්ශවයෙන් මංගල, හර්ෂ සමඟ කිහිපදෙනෙක්ද, සජිත් පාර්ශවයෙන් ශිරාල් ලක්තිලක මහතා සහභාගී විය. සම්පුර්ණ සංඛ්‍යාව 150ක් හෝ 200ක් වන්නට ඇත. රජය මීට බය වුයේ නම් වැරදි පුර්ව නිගමනයන්ට යාමෙනි.නමුත් මාධ්‍යය සංවිධානවලට මෙය අතිසාර්ථක කර ගැනීමට නොහැකි වුයේ ඇයි දැයි සොයා බැලිය යුතුය.ඒ අප පළමුව සදහන් කළ ජනතා අවශ්‍යතා සමඟ නොපෑහීම හේතුවෙනි.ඊට උදාහරණ කිහිපයක් දැක්විය යුතුමය.

මෙම උද්ඝෝෂණයේ ප්‍රමුඛ සටන් පාඨ අතර ඊ නිවුස් වෙබ් අඩවියද විය.එමෙන්ම සිරස ප්‍රහාරයද විය.ලංකා ඊ නිවුස් යනු කලක් යහපත් මාධ්‍යයක්ව තිබුණද දැන් වෛශ්‍යාවකගේ ගණයට වැටී ඇති බව මීට පෙර ලිපියක දැක්වීය.

මේ ලින්ක් එක බලන්න – වෛශ්‍යාවක වු ඊ නිවුස්

http://lankajanahada.wordpress.com/2011/12/26/%E0%B7%80%E0%B7%9B%E0%B7%81%E0%B7%8A%E2%80%8D%E0%B6%BA%E0%B7%8F%E0%B7%80%E0%B6%9A-%E0%B7%80%E0%B7%94-%E0%B6%8A-%E0%B6%B1%E0%B7%92%E0%B7%80%E0%B7%94%E0%B7%83%E0%B7%8A/

එකී කාරණා හේතුවෙන් මාධ්‍යය සදාචාරය තුට්ටුවකට මායිම් නොකරන මාධ්‍යයක් බවට ඊ නිවුස් පත්ව ඇත.විශේෂයෙන් අසත්‍යය ප්‍රවෘත්ති පලකිරීමෙන් එම පුවත් වෙබ් අඩවිය පිළිබඳ වු විශ්වාසය බිඳ වැටී ඇත.එවැනි මාධ්‍ය මර්ධනය කළයුතු යැයි හෝ එවැනි මාධ්‍යය මර්ධනයට එරෙහි වියයුතු නැතැයි ජනතාවට සිතී මෙම උද්ඝෝෂණයට සහභාගී නොවුවා වියහැකිය.මෙම උද්ඝෝෂණයට ඌණ ජන සහභාගීත්වයක් ලැබීමට සිරසද වගකිව යුතුය.මන්ද රනිල් පාර්ශවය ඊට වැඩි සහයෝගයක් නොදීමට එය හේතුවන්නට ඇත. දැන් පෙනීයන්නේ සජිත් පාර්ශවය සහ ජන අරගල කණ්ඩායම ලංකා ඊ නිවුස් නිසත්, රනිල් පාර්ශවය සිරස නිසත් මීට කැපවීමෙන් සහභාගී නොවු බවයි.අවසානයේ සිදුවුයේ වෙනදා මෙන් නිදහස් හා සාමකාමී ලෙස උද්ඝෝෂණය දියත්වීමයි.අරගලය පුස් වෙඩිල්ලක් වුයේ එලෙසිණි.

මින් මාධ්‍යය සංවිධාන උකහා ගතයුතු පාඩමක් ඇත.එනම් යම් විරෝධතාවක් සංවිධානය කරන විට එක් එක් මාධ්‍යය ඉලක්ක නොකළයුතු බවයි.මන්ද පොදුවේ ගතහැකි මාධ්‍ය පවතින්නේ ස්වල්පයක් බැවිණි.එමෙන්ම මාධ්‍යය සදාචාරයට එරෙහි මාධ්‍ය වෙනුවෙන් පෙනී නොසිටීමටද මාධ්‍ය එකමුතු සංවිධාන මින් මතුවට අධිඨන් කරගත යුතුය.

ශ්‍රී ලංකාවේ ඉපදෙන්නට සිටින දරුවාගේ සිට සෑම පුද්ගලයෙක්ම රුපියල් 2750ක් ණය කර,සෙන්ටිමීටරයකට රුපියල් 8000ක් වැය කරමින්,ගම් නියම්ගම් දෙබෑකරමින් විමල් වීරවංශ මහතා ප්‍රමුඛ ආණ්ඩුව විසින් සෑදු ආසියාව ආශ්චර්යයට පිවිසෙන E1 මාර්ගයේ ණය ගෙවීම දැන් ආරම්භ වී ඇත.

පසුගිය 27වනදා විවෘත කෙරුණු ආශ්චර්යයේ පිවිසුම මේ වනවිට රුපියල් ලක්ෂ 688ක ආදායමක් ලබා ඇති බව වාර්තා වේ.හරියටම කියනවානම් හයසිය අසුඅට ලක්ෂ විසි හයදහස් පන්සිය පනහකි.එනම් අපට ගෙවීමට ඇති රුපියල් කෝටි 7700යෙන් කෝටි 6ක් දැනටම සොයා අවසන්ය.මසක් ඇතුලත කෝටි 6ක ආදායමක් ඉපයීම සැබවින්ම ආශ්චර්යකි.මෙතරම් මුදලක් උපයා ගැනීමට හැකිවූයේ බොහෝදෙනා ආශ්චර්ය ආතල් ගැනීමට අධිවේගයෙන් ගිය නිසා වන්නට ඇත.ඒ හැරෙන්නට හම්බන්තොට වරායට පැමිණි බඩු තොග නම් මේ පාරෙන් කොළඹට ආ බවට වාර්තා නැත..කෙසේ හෝ කෝටි 6ක ආදායමක් ලැබීම රාජපක්ෂ ආණ්ඩුවේ ජයක්ග්‍රහණයක් බව සෑම රාජ්‍ය මාධ්‍යයකම උදේ සවස ප්‍රචාරය කරයි.අපද ඊට හද පත්ලෙන් සුබ පතමු.දැන් ජනතාවට මාර චූන්ය.රට විදේශිකයන්ගෙන් පිරී ඉතිරි ඇත,අධිවේගයෙන් කෝටි ගණනක් ආදායම් ලබා ණය බරිනුත් විශාල කොටසක් ගෙවා ඇත.නත්තලුත් කෑවේය.හෙට අනිද්දා නව වසරත් ලබයි.ලක්ෂ 3ක වැනි සුලු පිරිසකගේ විභාග ප්‍රතිඵල අවුල් වුවද තවත් එක් කෝටි හැත්තෑ හත් ලක්ෂයක් අධිවේගී චූන් එකෙන් පිනාගොස් ඇත.

නමුත් යතාර්ථය නම් මසකට කෝටි 6ක් නොව කෝටි 10යක  ආදායමක් ලැබුවද මුලු ණය ප්‍රමාණය ගෙවීමට වසර 65ක් පමණ ගතවෙයි.එමනිසාම ජපානය සමඟ ඇති ගිවිසුමට අනුව පළමු අවුරුදු 70 තුළ උපයන ආදායම ණය වශයෙන් ජපානයට ගෙවිය යුතුය.වසර 70ක් ගෙවීගිය පසු එනම් ඔබ අප ස්වර්ගස්ත වු පසු මෙම මාර්ගයේ අයිතිය ලංකා රජයට හිමි වේ.නමුත් එම ණය ගෙවීමට මහින්ද උන්නැහේද එතෙක් කල් ජීවත් වන්නේ නැත.අපට මෙම මාර්ගය ලැබෙන විට එහි ගන්නට දෙයක් ඉතිරිවන්නේ නැත.මෙහි උපරිම ආයු කාලය අවුරුදු පනහකට අඩු මිස වැඩි නොවේ.අවුරුදු පනහෙන් පසු මෙයද අද ගමේ කැඩුණු ගල් මතුවූ පාර වැනිම තවත් පාරක්වෙයි.හෙළ උරුමයටද ආණ්ඩුව මෙවැනි ගිවිසුම් වලට යාමේදී අනිත්‍යතාවය අමතක වී ඇත.නැතිනම් අමතකයි වගේ සිට ඇත.

පාරවල් සෑදීමටවත්,ආණ්ඩුවේ සංවර්ධන වැඩ වලටවත් අපේ විරුද්ධත්වයක් නොමැති වුවද මෙවැනි අදුරදර්ශී ක්‍රියා හරහා රටට වන හානිය නැවත ආපස්සට ගැනීමට නොහැකිය.එජාපය මෙම මාර්ගය සෑදීමට සැලසුම් කලේ ආයෝජකයන්ගෙන් මුදල් ලබාගෙන මිස ණය ලබාගෙන නොවේ.තමුත් රටේ වාසනාවට රනිල් වික්‍රමසිංහ ආණ්ඩුව පෙරලීගිය නිසා රටත් ඉතිරිවී,පාර සෑදීමද අඩාල විය.නමුත් එවැනි උපක්‍රම මේ මාර්ගය සෑදීමේදී රජය අනුගමනය කළේ නම් තත්වය මීට වඩා යහපත් වන්නට තිබිණ.

රටේ මහජනතාවගෙන් සුලු පිරිසක් සදහා සමස්ථ රට වැසියාම අඩ සියවසකට වැඩි කාලයක් ණයකාරයින් කිරීම කෙතරම් සාධාරණදැයි මොහොතක් සිතන්න.වසර 70කින් පසු අපට අයිතිවෙන අබලන් මාර්ගයේ යාමට කාර් රථයක් නැති අපි කරත්තයක්වත් සූදානම් කර ගනිමු.

සටහන එළ කොල්ලාගෙනි.

ආණ්ඩුවේ ආශ්චර්යය දැන් ටිකෙන් ටික උදාවෙමින් පවතී.අප සිතනා පරිදි ලංකාවට යස ඉසුරින් පිරී ඉතිරී යන්නට පටන් ගත්තේ භාරත ලක්ෂ්මන් යන ජනාධිති උපදේශකවරයාගේ අභාවයත් සමඟයි.අනේ වාසනාවන්!ජනාධිපතිවරයාව මෙතෙක් කල් මංඤන් කල  භාරත ඝාතනයත් සමඟ රට ආශ්චර්යට පිවිසීමෙන් හෙළිදරව් වේ.ලංකාවේ ආර්ථික වර්ධනය ඩොට් වෙන්න වර්ධනය වී ඇත.රට සුඛිත මුදිත වී ඇති බව ජංගම දුරකථන සෑමදෙනා ලගම තිබීමෙන් පැහැදිලි වන බව අග්‍රාමාත්‍යවරයා පසුගිය දිනක පැවසීය.එහෙව් රටක අධ්‍යාපනය ටිප් ටොප් වියයුතුය.නමුත් සිදුවී ඇත්තේ එය නොවේ.

ආසියාවේ ආශ්චර්යය උදාකිරීමට උදේ රෑ මහන්සි වන ජනාධිපතිවයාට අධ්‍යාපනය ගැන සොයා බැලීමට වේලාවක් නැතුව ඇතිය.අනේ පව්!එහෙත් ඔහුවෙනුවට ඇමතියෝද විශාල ප්‍රමාණයක් ඇත.මේ ළඟදීත් තවත් අධීක්ෂණ ඇමතිවරයෙක් අධ්‍යාපනයට පත්කර ඇත.එයින් පෙනීයන්නේ ඇමති මණ්ඩලේ තවත් ඉඩ ඇති බවයි.කෙතරම් අධ්‍යාපන ඇමතිවරු සිටියද ඔවුන්ටද අධ්‍යාපනය ගැන සෙවීමට හැර අනෙක් සෑමදේටම කාලවේලා ඇත.ඇස්.බී උන්නැහේට නම් ශිෂ්‍ය සංගම් සමඟ පැටලීම තරම් තවත් ජොලියක් නැත.ඔහුට පැවරී ඇති රාජකාරිය ශිෂ්‍ය ව්‍යාපාර මර්ධනය කිරීම සහ අධ්‍යාපනය හැකිතාක් පෞද්ගලීකරණය කිරීමයි.එය හොදින් සිදු කරන විට රජ වාසලින් ඔහුගේ විස්තර ගොනුවට ලකුණු වැටේ.

අධ්‍යාපන ඇමති බන්දුල ගුණවර්ධන මහතාටද උසස් පෙළ පිළිබඳව සොයා බැලීමට වේලාවක් නොමැති වුයේ එක ශ්‍රේණියට ලමුන් ඇතුලත් කර ගැනීම පිළිබඳ අධික රාජකාරි නිසා වන්නට ඇත.ඒ සදහා අධිකව මහන්සි වු බන්දුල ඇමතිවරයා වෙහෙස නිවාගැනීමට මේ වන විට විදෙස් ගතව ඇත.විභාග කොමසාරිස්වරයාද පවත්නා අධ්‍යාපන ක්‍රමය ගැන කළකිරී වන ගතව තවුස්දම් පිරීමට කොළඹින් බැහැරව ඇත.එම නිසා ඔහුටද අද පැවැත්වු මාධ්‍යය සාකච්ජාවට සහභාගී විය නොහැකි විය.

තූ…විතරක්! ලක්ෂ ගණනක් වියදම් කර පරීක්ෂා කොට ලබාගත් ප්‍රතිඵලය හරිහැටි පරිගණක ගත කර ගැනීමට නොහැකි ආණ්ඩුවේ නිලධාරීන්ට මහජන මුදලින් වැටුප් ගෙවන්නේ කුමන ලබ්බකටද? හුජ්ජ ගියත් ත්‍රස්තවාදී විජාතික බලවේගවල කුමන්ත්‍රණයක් ලෙස හදුන්වන විමල් වීරවංශ උන්නැහේ ගොන් ජෝක් දමා ප්‍රශ්ණයෙන් ලිස්සා හරී.මෙයත් අභ්‍යන්තර කුමන්ත්‍රණයක් කියා හදුන්වන ඔහුට අමතක වී ඇත්තේ තමන්ද එම කැබිනට්ටුවේ ඇමතිවරයෙකු බවයි.

රට පැන සිටින අධ්‍යාපන ඇමතිවරයා ටික දිනකින් පැමිණ ගොන් ජෝක් එකක් දමා සිඟිති ආතල් එකක් ගෙන ප්‍රශ්ණයේ යථා ස්භාවයෙන් පැනයනු ඇත.මෙවැනි ගැටලු ඇතිවීමට හේතුව ආණ්ඩුවේ වැරදි අධ්‍යාපන ප්‍රතිපත්ති හා වැරදි තීන්දු තීරණයි.එක් අතකින් බලන කළ මේ පිටුපස ලංකාවේ නිදහස් අධ්‍යාපනය හා ජාතික අධ්‍යාපනය අඩාළ කිරීමේ යටි උගුලක්ද වන්නට පුලුවන.ලබන වසරේ අධ්‍යාපන පොදු සහතික පත්‍ර උසස් පෙළ විභාගය වෙනුවට ලන්ඩන් උසස් පෙළ වැන්නක් පැවැත්වේදැයි අපට සැකයක් ඇත.කැබිනට් මණ්ඩලයේ ප්‍රධානියා වශයෙන් ජනාධිපතිවරයාද මීට සම්පුර්ණ වගකිව යුතුය.කාර් රේස් පැවැත්වීමට,හවසට ජොගින් දැමීමට පෙර මහින්ද උන්නැහේ කළ යුත්තේ තම වගකීම හරිහැටි ඉටු කිරීමයි.එසේ නොවුනහොත් ආශ්චර්ය උදාවන්නේ තම පවුලට පමණක් බව මතක තබාගත යුතුය.

සටහන එළ කොල්ලාගෙනි.

ලංකා ඊ නිවුස් කලකට පෙර අප දන්නා පරිදි ආණ්ඩු විරෝධී පුවත් අඩවියකි.එමනිසාම ආණ්ඩුවේ ප්‍රහාරයන්ටද ලක් වු අවස්ථා බොහොමයකි.ඊට අමතරව වැරදි ප්‍රවෘත්ති පලකිරීමෙන් අධිකරණයේ පෙනී සිටීමටත්,අධිකරණයෙන් සමාව ගැනීමටත් ඊ නිවුස් අඩවියට සිදුවිය.නමුත් සුවහසක් ජනතාව විශේෂයෙන් ආණ්ඩු විරෝධි බලවේග සියල්ලක්ම පාහේ ඊ නිවුස් වෙබ් අඩවිය අගය කළේය.නමුත් මීට මාස කිහිපයකට පෙර සිට වැරදි සහ පදනම් විරහිත ලිපි පළකිරීම සිදුවෙමින් පවතී. එවැනි සිද්ධීන් කිහිපයකට අධිකරණයෙන් සමාව ගැනීමට සිදුවු අවස්ථාද බොහොමක් ඇතිවිය.එමඟින් ජනතාවට ලංකා ඊ නිවුස් කෙරෙහි වු විශ්වාසය පලුදු කරගෙන ඇත.

විදෙස් රටක සිට යාවත්කාලීන වන ලංකා ඊ නිවුස් අඩවියේ මෙම වගකීම් විරහිත ස්වභාවය පිළිබඳ අප යම් යටි විමර්ශණයක් කලෙමු.ඔවුන් දැන් ආණ්ඩුවට කරන පහරදීම් ක්ෂය කොට ඇත.එයට අපට දොසක් කීමට නොහැක්කේ ඒකාධිපති රාජපක්ෂ පාලනය හමුවේ ජීවත්වීමේ ආසාවක් ඇති නිසාවෙනි.නමුත් එංගලන්තයේ සිටින එහි කර්තෘවරයා තම අඩවිය අයුතු ක්‍රියා සඳහා විකුණන බවක් හෙළිදරව් වී ඇත.

ඔවුන් ආණ්ඩුව සමඟ ඇති සටන මිඩංගු කොට විපක්ෂයේම පාර්ශව දෙකකට පහර ගසන අතර විපක්ෂයේම තවත් පාර්ශව දෙකක ගුණ කියයි.අප විමර්ශණය දිවගියේ ඒ ඔස්සේයි.ඔවුන් පහරදෙන එක් කණ්ඩායමක් නම් ජවිපෙ කැරළිකාර පාර්ශවයයි.කැරළිකාර පාර්ශවය විමල් වීරවංශ මෙහෙයවන බව ආරංචි ලැබෙමින් පවතී.ඒ කුමක් වුවත් ඊට පහරදීමට ලංකා ඊ නිවුස් නොපැකිලිව ඉදිරිපත් වී ඇත.ඒ සදහා ජවිපෙ මුදල් කමිටුවෙන් එංගලන්තයට මුදල් යවන බවට කටකතා තිබුණද එය අපට තවමත් සාක්ෂි මඟින් ඔප්පු කළ නොහැක.ජෙනරාල් සරත් ෆොන්සේකා ඇතුලු ප්‍රජාතන්ත්‍රවාදී ජාතික සංධානයේ ඇත්තන්ගේ ගුණ කීමටද ඊ නිවුස් අමතක කොට නැත.ඒ ඉහතෝක්ත බඩගෝස්තරය රැකගැනීම පිණිස බව අප අවසානයට එළබෙන නිගමනයයි.

ඇත්තෙන්ම ජෙනරාල් සරත් ෆොන්සේකාගේ ගුණකීම අපට අනුමත කළහැක.මන්ද රාජපක්ෂ පාලනය ඔහුගේ ගුණ වසන් කරන නිසාවෙනි.නමුත් වරද ඇත්තේ මුදලට යට වීමයි.දෙවනුව ඔවුන් පහර දෙන්නේ එජාපයේ ප්‍රතිසංවිධාන පිලටයි.ඒ සඳහා ඊ නිවුස් කර්තෘවරයාට රනිල් වික්‍රමසිංහ මසකට ලංකා රුපියල් වලින් ලක්ෂ 3ක මුදලක් යවන බවට සාක්ෂි සහිතව ඔප්පු කළ හැකිය.සැබවින් විවේචනය ඉතාමත් අගනේය.නව සංකල්ප මෙන්ම දැනුම බිහිවන්නේද විවේචන මඟිනි.එමනිසා අප සිතනා පරිදි විවේචන ප්‍රතිසංවිධාන පිළට විශාල රුකුලකි.නමුත් ඉන් ඊ නිවුස් අඩවිය වෙසඟනකගේ තත්වයට වැටෙන බව ඔවුන් දැනගත යුතුය.ලක්ෂ 3ක් වැනි සුලු මුදලකට (එංගලන්තයේ) තම වෙබ් අඩවිය අවභාවිතා කිරීමට තරම් ඊ නිවුස් කර්තෘවරයා බංකොලොත්වීම සැබවින්ම කණගාටුවට කරුණකි.නිදහස් මාධ්‍ය අප සෑම විටම අගය කරන අතර කවරෙකුගේ හෝ මුදලට යට වී ඒ තැනැත්තාට කඩේයාම කිසිලෙසකින් අනුමත කළ නොහැක.

සටහන කර්තෘගෙනි.

පසුගිය 19වනදා සිරිකොත ඉදිරිපිට වූ යුධ පිටිය ගැන අමුතු විග්‍රහ අවශ්‍යය නොවුවත් යම්තාක් දුරට ඒ පිළිබඳ හෙළිදරව්වක් කිරීම වටිනා බව අපගේ අදහසයි.සැබවින්ම එකී සිද්ධිය පෙර සූදානමකින් කරන ලද්දක් වූවානම් එය අපට මහත් අගෞරවයකි.නමුත් සිදුවී ඇත්තේ අනෙකක් බව පසුගියදා නුගේගොඩ මහේස්ත්‍රාත් H.M.R. අනුර කුමාර මහතා ලබාදුන් තීන්දුව මඟින් හෙළිදරව් වේ.එපමණක් නොව එම සිද්ධිය වන අවස්ථාවේ එතැන සිටි පුද්ගලයෙකු ලෙස කර්තෘ වන මා ද ඊට සාක්ෂි දරයි.

නඩු අංක: බී/4390/11 අදාළව දෙන ලද ඇප නියෝගයේ 3වන පිටුවේ දෙවන ජේදයේ සදහන් වන පරිදි රනිල් පාර්ශවයේ මැරයන් පිරිසක්ද ඊට සම්බන්ධ බව හෙළිදරව් වේ.ඔවුන් පොලු මුගුරු රැගෙන සූදානම්ව සිටියත් ඔවුන්ට පිටත සිටි බහුතර පාක්ෂික මතයට අභියෝගයක් විය නොහැකි නිසාවෙන් ඇතුලට වී සිටි බව රෝසි සේනානායක ඊයේ මාධ්‍යයට ප්‍රකාශ කලේය.තවත් ඔවුන්ගේම පිරිසක් එළියේ සිට පාර දෙසට ගල් ගැසූ අයුරු ඉනිද්‍රීය ප්‍රත්‍යක්ෂයෙන් දැක ගතිමු.

දැන් රනිල් උන්නැහේගේ ලොකුම වචනය බුදු මැදුරට ගල් ගැසීමයි.නමුත් ඔහුට අමතක වූ දෙයක් ඇත.බුදු මැදුර ඇත්තේ ඔවුන්ගේ දෙසට මුහුණලා බවයි.අප එතැනින් පිටවන විටත් බුදු මැදුරට හෝ පිළිමයට කිසිදු අනතුරක් සිදුවී තිබුනේ නැත.විශේෂයෙන් අපේ ස්වාමීන් වහන්සේලා ඒ පිළිබඳ සැලකිලිමත් වූ බව දැක්කේය.එසේනම් නිසැකවම රනිල් උන්නැහේ තම සුපුරුදු මිෂනාරී වෙස් මුහුණ පැලදගෙන ඇත.එක ගලෙන් කුරුල්ලන් දෙදෙනෙක් දඩයම් කරමින් බුදු මැදුරටත් ගසා පාක්ෂිකයන්ද පොලීසියට පවා දෙමින් සිටී.

ජෙනරාල් සරත් ෆොන්සේකා පැවසු පරිදි අද ආණ්ඩුවේ සහ රනිල්ගේ වෙනස වටහා ගත නොහැකිය.ඔහුට එරෙහිව නැගී සිටින බහුතර බලවේගය පරාජය කිරීමට ආණ්ඩුවේ සහයද ලැබෙන බව අගමැතිවරයාගේ සිට මර්වින් සිල්වා දක්වා ප්‍රකාශ කර ඇත.මහින්ද රාජපක්ෂ හා රනිල් වික්‍රමසිංහ අතර එකඟතාවයක් ඇති කිරීමට තමා පෙරමුණ ගත් බව ගංගාරාම පොඩි හාමුදුරුවෝ ප්‍රසිද්ධියේ පැවසීය.දැන් පෙනී යන්නේ “ගලබඩ ගිවිසුම” හොදින් ක්‍රියාත්මක වන බවයි.

එමඟින් ආණ්ඩුව සමඟ ඩීල් දමන රනිල් ආණ්ඩුවට හොදහැටි පහර දෙන දයාසිරි ජයසේකර ලස්සනට තනතුරෙන් පහකොට ජන්දයක් දිනාගත නොහැකි දයා ගමගේ වැනි හාල්පාරුවෙක් ජාතික සංවිධායක ලෙස පත් කරයි.ඌ තනතුරට පත්වී පැමිණ දයාසිරිගේ ජයක්ග්‍රහණය බලාපොරොත්තුවෙන් සිටි ජනතාවට අත වැනූ විට පැමිණි හූ හඬ කිසිදා අමතක නොවනු ඇත.

අනෙක් පාර්ශව කෙටවීමට සජිත් ප්‍රේමදාස මහතා නියෝජ්‍යය නායක ලෙස ඡයක්ග්‍රහණය කර වු බව ළදරුවෙකුට තේරෙන කාරණයකි.නමුත් එය අසාර්ථක සිඟිති ආතල් එකක් පමණක්ම විය.අද සටන තවත් ශක්තිමත්ය.සජිත්, කරු සටනේ දයාසිරි,රෝසි,සුජීව,රංජිත්,බුද්ධික පමණක් නොව රංගේ,තෙවරප්පෙරුම මෙන්ම හරීන්ද සිටී.ශිරාල්,මෛත්‍රී,රවී ඇතුලු දෙවන පෙළද අත්දැකීම් හා සටන්කාමීත්වයෙන් සන්නද්ධය.තෙවනුව තරුණ බලමුලුවඳ ශක්තිමත්ව ඉදිරියට එනු ඇත.භික්ෂු සංවිධාන,සිවිල් සංවිධාන,කාන්තා සංවිධානද රනිල්ට පරාවලල්ලක් වනු නොඅනුමානය.මහා නායක හිමිවරු නොතකා රනිල් යන ගමනින් බෞද්ධ බලවේගද රනිල් එළවීමට පෙරමුණ ගනු ඇත.ජෙනරාල්ද අප සමඟය.ආණ්ඩුවට කඩේ යන මාධ්‍ය හැරුණු කොට ස්වාධීන මාධ්‍යය සියල්ල ශක්තිමත් විපක්ෂයක අවශ්‍යයතාවය දකී.රනිල්ගෙන් මසකට ලක්ෂ 3ක මුදලක් ගෙන ඔහුට කඩේ යන ලංකා ඊ නිවුස් හැරුණු කොට ආණ්ඩුවට එරෙහි සියලු බලවේග රනිල් ඉවත් කළ යුතු තැන සිටී.

රනිල් එළවීමේ සටන නොබියව පෙරට යන අතර මින් ඉදිරියට එය වඩ වඩාත් ශක්තිමත් වනවා මිස එකදු අඩියක් පස්සට නොයන බව රනිල් ප්‍රමුඛ බත් ගොට්ටන්ට මතක් කර සිටී.සිරගතකොට හෝ මරාදමා ලෝකයේ කිසිදු බලවේගයක් මුළිනුපුටා දැමිය නොහැකි බවත් එකෙකු නසන කළ තවත් දස දහසක් උපදින බව දැනගත යුතුය.

මෙහි දැක්වෙන සියලු කාරණා facebook අඩවියෙන් උපුටාගත් ඒවා වන අතර ඒවායේ සත්‍ය අසත්‍යයතාවය සොයා බලන්න.